دِيـما

كيف جو زي هيك جميل وهدوء أجمل ، كافي انه يحسس قلبي بالراحة بعد ما كان أسبوع كامل بتخبط وحزين !سبحانك يا رب ، وسبحان لطفك ورحمتك بقلوبنا 🤍

فَوَ أَسَفا على نفسِي ، لكي أحيا أُحارِبُني! https://www.youtube.com/watch?v=C7Ala1mOY5g&list=RDC7Ala1mOY5g&start_radio=1

ألا ليتَ البلادَ تعودُ بلادًا ، فيكتفي الشيبُ منّا ، ونحظى بأن نعيشَ ما تبقّى من شبابنا كما يليقُ بنا ...

كنت بحضر سبونج بوب ... لفتتني كثير شغلات بس أكثر شغلة لفتتني ، بأحد الحلقات سبونج بوب كان بده يتعلم من شفيق الفن كان هو المعلم وسبونج هو الطالب ، فجأة اكتشف شفيق انه سبونج الفن عنده أحسن وأشطر منه ، هل اعترف ؟ ... لا وضل يحبط بسبونج بوب لحد ما حس حاله فاشل ، وشفيق عكس مشاعر الفشل على سبونج بوب عشان يحس بالنصر وانه هو أحسن منه ... بالنهاية سبونج بوب استسلم وشفيق حس بالنصر ... قديه مواقف ومرات ما كنا واثقين بحالنا فيها وكان فيها حدا زي شفيق خلانا نتخلى عنها ونحس حالنا فاشلين!

شكله هاليوم ملان دموع ... شفت فيديو لفلسطينية من الشتات بأحد المخيمات ، بتعاني بظروف حياتها وعاملة مشروع ولأنها فلسطينية ولاجئة ما بقربوا عليها الناس ... خطرتلي شغلة وحدة بس ، الأراضي المسلوبة منا وهي الهم بتجنن بأحلى أماكن ، دايمًا بس كنت أمر أو أشوف فيديو لهيك أماكن كنت أتخيلهم رجعوا لأرضهم ، في منطقة دايمًا كنت أصورها كنت أحكي لحالي بلكي حدا منهم مشتاق لأرضه وصدفت أرضه هان بفرجيه الفيديوهات اللي معي ... يا الله تخيلت رجعتهم على البلاد والله لبلاد بدونهم مش بلاد ، اللاجئ مش ارهابي اللاجئ هو قطعة من قلوبنا وقطعة كبيرة من أرض لمن راحوا راحت منا ، اللاجئ هو قصة بتحكي عن مجازر وتهجير الجزء الأكبر من قضيتنا هي اللاجئين ...

شفت فيديو لحج بالخليل ضربوا عشان بده كتاب يثبت انه المنطقة هاي مغلقة ويروح يرفع قضية عشان يسمحولوا يفوتوا على داره ... الاشي اللي قهرني أكثر اشي ، انهم بيطردونا وبيهجرونا وبيكتلو فينا بدون قانون ولمن احنا بدنا حقنا الحقيقي والمشروع لازم نطالبه بالقانون ، وأي قانون ؟ بالقانون تبعهم ! جد لوكتيش كل هالظلم والجور يا الله ، والله تعبت قلوبنا وانهد حيلنا من كل القصص اللي بنشوفها وبنعيشها ، يا رب فرجك ولطفك ورحمتك فينا يا رب هالمصائب تكون طريق للهداية مش لضلالة ، يا رب اجبر قلوب كل مين فقد وثبت أقدام أسرانا وأعطينا القوة والعزيمة لنواجه كل المصاعب